حمله مسلحانه از خاک افغانستان به تاجیکستان؛ سه شهروند چینی کشته شدند

خبرگزاری آگاه
وزارت خارجه تاجیکستان اعلام کرده است که شب گذشته، در حمله‌ای مسلحانه از خاک افغانستان به ولایت خُتلان این کشور، سه شهروند چینی کشته و چهار تن دیگر زخمی شدند.
بر اساس بیانیه وزارت خارجه تاجیکستان، این حمله با استفاده از اسلحه و یک پهپاد مجهز به نارنجک انجام شده و هدف آن مقر کارکنان یک شرکت خصوصی به نام «شاهین» بوده است. هویت زخمی‌ها تاکنون مشخص نشده است.
وزارت خارجه تاجیکستان ضمن تقبیح این حمله، از طالبان خواسته است اقدامات مؤثری برای تضمین ثبات و امنیت مرزی انجام دهند. این وزارتخانه همچنین تأکید کرده است که با وجود تلاش‌های مستمر برای حفظ امنیت و ایجاد صلح در مناطق مرزی، فعالیت‌های مختل‌کننده گروه‌های جنایت‌کار مستقر در افغانستان همچنان ادامه دارد.
تا کنون هیچ گروهی مسئولیت این حمله را بر عهده نگرفته و طالبان نیز اظهار نظر نکرده‌اند. پیش‌تر، منابع محلی به روزنامه ۸صبح گفته بودند که در این حمله علاوه بر قربانیان چینی، چندین نفر دیگر نیز زخمی شده‌اند.
این حادثه در حالی رخ داده که بسیاری از نهادهای بین‌المللی و کشورهای منطقه معتقدند گروه‌های شبه‌نظامی فعال در افغانستان بزرگ‌ترین تهدید برای امنیت آسیای مرکزی هستند. همچنین پیش‌تر طالبان و مرزبانان تاجیکستان در برخی نقاط مرزی با یکدیگر درگیر شده بودند، که نشان‌دهنده وضعیت تنش‌آلود و آسیب‌پذیر مرزهای افغانستان و تاجیکستان است.